我恨我係一個愛自尋煩惱嘅人

邊有人似我，嫌工作太悠閑？一個月難得有三幾日冇嘢做，我偏偏搵老細complain我太得閑，重要麻煩佢搵啲嘢畀我做，佢都話我怪。

======================================

老竇打人情牌已經幫我辦咗Eason演唱會飛，之後佢問我睇唔睇汪阿姐，跟住又問我睇唔睇林峯，3壇同一日，玩咩？阿姐唔睇就罷，論音樂我就想睇Eason多啲嘅，不過我又想同啲friend去追林峯噃，多人好玩嘛。本來佢哋一個深夜一個下晝，最慘一個喺康州一個喺大西洋城，如果勉強都可以走兩場，不過大西洋城去康州要開5個鐘頭車，攰都攰死我咯。嚡，雖然我想少爺幫我簽咗張唱片海報，不過佢演唱會要我自己揞荷包買飛我又唔係好捨得 （我只會為黎天王，郭天王，同黃生濶佬），所以這次應該唔去捧少爺同敏之場，有啲可惜，不過算啦。

======================================

嚡，講講呢幾日嘅心情：…矛…盾….矛盾矛盾矛盾矛盾矛盾！
有人勸我，有人話我，有人諒解我，亦都有人嬲我。我唔會因爲人哋叫我幾聲”G神”就以爲自己萬能，我都係人啫。為個死仔包搞論壇，一開始我冇打算咁involve架噃，我幫朋友之嘛，搞搞下又會無啦啦咁複雜，搞到自己冇曬時間冇曬心情enjoy佢本人嘅演出。老實講，我對黃生嘅feel已經所剩無幾，7年幾感情亦已經畀佢身邊嘅事端磨滅得八八九九，唔理啲事端係人爲還是誤會，已經影響到我同好多人。如果我夠絕，一個click，LB將成爲過去，所有執著，所有煩惱都會隨之成爲過去，不過我又做唔出。因爲我係我，我係一個好情緒化但係又唔夠衝動，好感性但係又好鬼理性的巨蟹，一隻鍾意用石頭壓住自己個殼的巨蟹女。